उत्कृष्ट लयमा रहेको स्पेनिस टोली पूर्व विश्वविजेता फ्रान्सलाई स्तब्ध पार्दै फिफा विश्वकप २०२६ को फाइनलमा प्रवेश गरेको छ।  डलास स्टेडियममा भएको रोमाञ्चक सेमिफाइनल भिडन्तमा फ्रान्सलाई २-० गोल अन्तरले पाखा लगाउँदै स्पेनले उपाधि नजिकको यात्रा तय गरेको हो। स्पेनको जितमा मिकेल ओयार्जाबल र पेड्रो पोरोले निर्णायक गोल गरे।

खेलको सुरुवाती समयदेखि नै आक्रामक रणनीति अपनाएको स्पेनले २२ औं मिनेटमा अग्रता लिएको थियो। आफ्नो १९ औं जन्मदिन मनाएको भोलिपल्टै मैदान उत्रिएका युवा विङ्गर लामिन यामललाई फ्रान्सका लुकास डिग्नेले पेनाल्टी बक्सभित्र लडाएपछि स्पेनले पेनाल्टीको अवसर पाएको थियो। 

उक्त अवसरलाई सदुपयोग गर्दै मिकेल ओयार्जाबलले फ्रान्सेली गोलकिपर माइक मेइग्ननलाई बिट गर्दै टोलीलाई सुरुवाती अग्रता दिलाए। यो गोलसँगै ओयार्जाबल स्पेनका लागि ३० गोल पूरा गर्ने छैटौं खेलाडी समेत बनेका छन्।

पहिलो हाफमा एक गोलको अग्रता बनाएको स्पेनले दोस्रो हाफमा थप आक्रामक खेल खेल्यो। खेलको ५८ औं मिनेटमा राइट-ब्याक पेड्रो पोरोले ड्यानी ओल्मोसँग उत्कृष्ट 'वान-टु' पासको तालमेल मिलाउँदै फ्रान्सेली डिफेन्सलाई बिट गरेर बललाई पोस्टको तल्लो कुनामा भित्र्याए। 

खेलमा २-० ले पछि परेपछि फ्रान्सले रेयान चेर्की र डेसिरे डोउलाई मैदान छिराउँदै खेलमा फर्किने प्रयास गरेको थियो। स्टार स्ट्राइकर किलियन एम्बाप्पेले केही राम्रा अवसरहरू सिर्जना गरे पनि स्पेनिस डिफेन्डर मार्क कुकुरेलाको उत्कृष्ट ट्याकल र गोलकिपर उनाई सिमोनको चनाखो प्रदर्शनका कारण फ्रान्सको प्रयास सफल हुन सकेन।

यो जितसँगै स्पेनले यस प्रतियोगिताको ७ खेलमध्ये ६ खेलमा 'क्लिन सिट' राख्दै आफ्नो बलियो डिफेन्सको नमूना प्रस्तुत गरेको छ। ऐतिहासिक जितपछि प्रतिक्रिया दिँदै स्पेनका प्रशिक्षक लुइस डे ला फुएन्तेले फ्रान्स विश्वकै उत्कृष्ट टोलीमध्ये एक भए पनि आज मैदानमा उनीहरूको अगाडि विश्वकै सर्वश्रेष्ठ टोली उपस्थित भएको दाबी गरे। खेलमा उत्कृष्ट प्रदर्शन गरेका पेड्रो पोरो 'प्लेयर अफ दि म्याच' घोषित भए।

सन् २०१० को विश्वविजेता स्पेनले अब उपाधिका लागि आइतबार न्युयोर्क न्युजर्सी स्टेडियममा इङ्गल्याण्ड र अर्जेन्टिनाबीचको विजेतासँग प्रतिस्पर्धा गर्नेछ। पराजित फ्रान्सले भने आगामी शनिबार कांस्य पदकका लागि तेस्रो स्थानको खेल खेल्नेछ।