२०८१ बैशाख ७ गते , शुक्रबार

बिर्तामोडमा देखियो कालाजार रोगको संक्रमित

sajilo news
झापा
२०८० चैत्र २० गते , मंगलबार
बिर्तामोडमा देखियो कालाजार रोगको संक्रमित

झापाको बिर्तामोडमा एक जनामा कालाजार रोगको संक्रमण देखिएको छ । वडा नम्बर ५ का ५२ वर्षीय पुरुषमा कालाजारको संक्रमण देखिएको हो । संक्रमित फेला परेपछि स्वास्थ्य कार्यालय झापाले जनप्रतिनिधि, स्वास्थ्यकर्मी, महिला स्वास्थ्य स्वयमसेविका, सरोकारवाला लगायतलाई अभिमुखीकरण तथा सक्रिय खोजपडताल परीक्षण कार्यक्रम अघि बढाएको छ । 
मंगलबार वडा नम्बर ५ को वडा कार्यालयमा वडाअध्यक्ष रोहित प्रसाईँको अध्यक्षतामा अभिमुखीकरण कार्यक्रम सम्पन्न भयो । कार्यक्रममा स्वास्थ्य कार्यालय झापाका कालाजार रोग फोकल पर्सन वीरेन्द्र दासले रोगका विषयमा सम्पूर्ण जानकारी दिए । स्वास्थ्य कार्यालयले संक्रमित व्यक्ति रहेको टोल जात्रुबारीमा नजिकका १७ जनाको आरडिटी किट मार्फत रगत परीक्षणसमेत गरेको छ । परीक्षण गरिएका सबैमा संक्रमण नदेखिएको बिर्तामोड नगरपालिका स्वास्थ्य शाखाका सिनियर अहेब दीपक सापकोटाले जानकारी दिए । परीक्षणमा विश्व स्वास्थ्य सङ्गठनका प्रतिनिधिको समेत उपस्थिति रहेको स्वास्थ्य कार्यालयका प्रयोगशाला सहायक चन्द्र शेखर कुमार यादवले जानकारी दिए । प्रोटोजोआको लिस्मेनिया परजीवी ‘स्यान्ड फ्लाई’ नामको पोथी भुसुनाको टोकाइबाट मानिसमा कालाजार संक्रमण हुने गर्छ ।

सम्बन्धित समाचार