झापाको अर्जुनधारा नगरपालिका–९ बारघरेस्थित शनिश्चरे–जयपुर सडक खण्डमा भएको स्कुटर दुर्घटनामा घाइते भएका एकजनाको उपचारका क्रममा निधन भएको छ।

१९ दिनअघि गत असार १० गते साँझ करिब ६ बजे शनिश्चरेबाट जयपुरतर्फ जाँदै गरेको प्र.१–०१–०१७ प ४५४ नम्बरको स्कुटरले बाटो काट्दै गरेको मे ९ प १५०७ नम्बरको मोटरसाइकललाई ठक्कर दिँदा स्कुटर चालक अर्जुनधारा–९ निवासी ७० वर्षीय नरेन्द्रप्रसाद अधिकारी गम्भीर घाइते भएका थिए। दुर्घटनामा टाउकोमा गम्भीर चोट लागेका अधिकारीलाई बिर्तामोडस्थित बीएण्डसी अस्पतालमा उपचारका लागि ल्याइएको थियो । अस्पतालबाट घर लगिएका अधिकारीको आज बिहान ३.३० बजे घरमै मृत्यु भएको बिर्तामोड प्रहरीले जनाएको छ।

उक्त दुर्घटनामा स्कुटरमा पछाडि सवार उनकी बुहारी सीता गौतम अधिकारीको हात र खुट्टामा सामान्य चोट लागेको थियो भने मोटरसाइकल चालक बुद्धशान्ति गाउँपालिका–१ निवासी २० वर्षीय साहिल साह पनि सामान्य घाइते भएका थिए।