झापाको हल्दिबारीमा घरमा रोटी पकाउने क्रममा ग्यास लिक भएर आगलागी हुँदा घाइते भएकामध्ये दुई जनाको अवस्था गम्भीर बनेको छ । आज बिहान ८ः४० बजे हल्दिबारी–४ स्थित ओली चोकका ६० वर्षीय पुण्यप्रसाद ओलीको घरमा रोटी पकाउने क्रममा ग्यासबाट अचानक आगो सल्किएको थियो ।

आगलागीमा परी घरधनी ओली, उनका छोरा बुहारी ३३ वर्षीय छोरा सन्तोष ओली, ३२ वर्षीया अनिता ओली र कान्छो छोरा २० वर्षीय आर्यन ओली घाइते भएका हुन् । उनीहरू शरीरको विभिन्न भागमा आगोले जलेर घाइते भएका हुन् । ती चार जनामध्ये घरधनी ओली र उनका कान्छा छोराको अवस्था गम्भीर बनेको हो ।

दुवै बाबु छोरालाई हेलिकप्टरबाट काठमाडौँको कीर्तिपुर अस्पताल लगिएको छ । ओलीको घरको दोस्रो तलाको भान्सा कोठामा रोटी पकाउने क्रममा ग्यास लिक भएर आगलागी भएको थियो । सोही आगो निभाउने क्रममा उनीहरू घाइते भएको प्रहरीले जनाएको छ । उनीहरूलाई उद्धार गरेर ओमसाई पाथीभरा अस्पताल पठाइएको थियो । आगलागीबाट घरको भान्सा कोठा आंशिक रुपमा क्षति भएको छ । अस्थायी प्रहरी पोस्ट कञ्चनश्रीबाट खटिएको प्रहरी टोली र स्थानीयको सहयोगमा बिहान ९ः१५ बजे आगो नियन्त्रणमा लिइएको थियो । घटनाको सम्बन्धमा थप अनुसन्धान भइरहेको प्रहरीले जनाएको छ ।