महेन्द्ररत्न माध्यमिक विद्यालय बिर्तामोड–३ बिर्ताबजारका भूतपूर्व विद्यार्थी डा. लक्ष्मीप्रसाद मैनालीले आफूले अध्ययन गरेको विद्यालयका जेहेन्दार विद्यार्थीलाई वर्षेनि प्रदान गर्ने गरी पुरस्कारको स्थापना गरेका छन् ।

उनले आफ्ना दिवङ्गत हजुरबुवा रामप्रसाद मैनाली (गाउँ बुढा ), हजुरआमा विशेश्वरा मैनाली र बुवा खेमप्रसाद मैनालीको सम्झनामा राम– विशेश्वरा –खेम स्मृति पुरस्कार स्थापना गरेका हुन् । यस वर्ष स्थापना गरिएको सो पुरस्कार पहिलो पटक तीनजना जेहेन्दार विद्यार्थीहरूलाई प्रदान गरिएको छ । गणित, विज्ञान र नेपाली विषयमा उत्कृष्ट तीन विद्यार्थीलाई प्रोत्साहनका लागि पुरस्कारको व्यवस्था गर्ने डा. मैनाली भूतपूर्व विद्यार्थी समाज महेन्द्र रत्न माविका संस्थापक सदस्य हुन् । आज एक कार्यक्रमका बीच संस्थापक डा. मैनाली , उनकी श्रीमती सुमा सेढाई , दिदी विष्णु सङ्ग्रौला , भूतपूर्व विद्यार्थी समाजका अध्यक्ष राजकुमार पोखरेल , विद्यालयका प्रधानाध्यापक खड्गप्रसाद खरेललगायतले सो पुरस्कार प्रदान गरेका थिए ।

त्यस अवसरमा भूतपूर्व विद्यार्थी समाजका उपाध्यक्ष मदनगोपाल सुब्बा , महासचिव मोहन सिवाकोटीलगायतका पदाधिकारी तथा सदस्यहरू , विद्यालयका शिक्षक र विद्यार्थीहरूको उपस्थिति रहेको थियो । प्रधानाध्यापक खरेलले सञ्चालन गरेको कार्यक्रममा स्वागत मन्तव्यसहित औचित्यमाथि संस्थापक डा. मैनालीले प्रकाश पारेका थिए भने धन्यवादसहित कार्यक्रमको समापन भूतपूर्व विद्यार्थी समाजका अध्यक्ष पोखरेलले गरेका थिए ।