२०८१ बैशाख ७ गते , शुक्रबार

झापाको बालमैत्री पालिकामा प्रधानाध्यापकले नीलडाम हुने गरी कुटे विद्यार्थी

sajilo news
झापा
२०८० चैत्र २१ गते , बुधबार
झापाको बालमैत्री पालिकामा प्रधानाध्यापकले नीलडाम हुने गरी कुटे विद्यार्थी

झापा । झापाको कमल गाउँपालिकामा रहेको एक सामुदायिक विद्यालयका एक प्रधानाध्यापकले विद्यार्थीलाई मरणासन्न हुने गरी कुटपिट गरेका छन्। फेसबुक स्टाटसमा कमेन्ट गरेको निहुँमा कमल गाउँपालिका- ५ को मंगलमय माध्यमिक विद्यालयका प्रधानाध्यापक मोहन बगालेले कक्षा ११ मा अध्ययनरत विद्यार्थी निर्जला बाँस्कोटालाई मरणासन्न हुने गरी कुटपिट गरेका हुन्।

‘फेसबुकमा हेडसलाई गाली गरेर लेखेको एउटा स्टाटस थियो । त्यसमा मैले थोरै भएन र भनेर कमेन्ट गरेकी थिएँ,’ निर्जलाले भनिन्, ‘मंगलबार स्कुलको अफिसमा हेडसरले खानेपानीको नालाले खुट्टामा कुट्नुभयो।’कुटपिटबाट बालिकाको खुट्टामा नीलडाम भएको छ। कुटपिटपछि अभिभावक बोलाएर कागज गरेर उनलाई विद्यालयबाट निकालिएको गुनासोसमेत गरिन्। 

‘मलाई कुटेपछि बुबालाई बोलाएर कागजमा साइन गर्न लगाइयो । भोलिदेखि स्कुल नआउनु भन्नुभएको छ,’ उनले भनिन् । छोरीलाई कुटपिट गरेपछि तत्कालै आफूलाई विद्यालय बोलाइएको उनका बुबा नवराज बाँस्कोटाले बताए। 

‘मलाई फोन आयो । पाँच मिनेटमा जसरी पनि आइपुग्नुपर्छ, अरू म जान्दिनँ भनियो। म जाँदा स्टाटसमा कमेन्ट गरेको कुरा निस्कियो,’ उनले भने, ‘एउटा कागज गरेर मलाई दायाँ–बायाँ सही र ल्याप्चे पनि हनाए। त्यो स्टाटस लेख्ने केटालाई पनि म त्यहीँ हुँदा-हुँदै तीन पाइप हाने। छोरीले गलत गरेको भए कानुनी रूपमा सजाय भोग्न तयार हो। तर, यसरी कुट्न पाइँदैन । यसरी कुट्ने हेडसरलाई कानुनी कारबाही हुनुपर्छ।’

कुटपिटमा संलग्न प्रधानाध्यापक बगालेले भने घटनाबारे बोल्न मानेनन्। उनले यहीबारेमा छलफल गर्न आफू इलाका प्रहरी कार्यालय दमकमा रहेको बताए।  मंगलमय माविका विद्यालय व्यवस्थापन समितिका अध्यक्ष तीर्थ थापाले बालिकामाथि कुटपिट भएको स्वीकार गरे। यसरी बालिकामाथि कुटपिट हुनु गलत भएको बताए पनि उनले यो विषय मंगलबार नै अभिभावकसँग कागज गरेर मिलाएको दाबी गरे। ‘म हिजो विद्यालयमा थिइनँ। विषय आज थाहा पाएँ,  हिजो अभिभावक नै आएर समझदारी कायम भएको रहेछ,’ उनले भने, ‘कसले के स्वार्थमा के गरो भन्ने विषयमा हाम्रो आपत्ति हो। कुटपिट गलत भयो भन्ने कुरा मेरो पनि हो।’  

कमल गाउँपालिकालाई करिब दुई महिनाअघि मात्र बालमैत्री गाउँपालिका घोषणा गरिएको थियो। बालमैत्री पालिकामा पनि बालबालिकामाथि हिंसा घटेको छैन।

यसै बीच नेरास्ववियू झापा जिल्ला कमिटिले यस घटनाको बिषयमा बिज्ञप्ती जारी गरेकोेछ । अध्यक्ष विनम सरदार हस्ताक्षरित बिज्ञप्तीमा निर्जला बास्कोटा माथी भएको निर्घात कुटपिटको प्रति अनेरास्ववियू जिल्ला कमिटि झापाको गम्भीर ध्यानाकर्षण भएको जनाएको छ । 

सम्बन्धित समाचार