बिर्तामोड । झापाको बिर्तामोड–३ स्थित आदर्श स्कुल अफ म्यानेजमेन्टले कक्षा ११ का विद्यार्थीलाई स्वागत गर्दै दसैँ विशेष कार्यक्रम सम्पन्न गरेको छ।

झापाका विद्यार्थीमाझ सधैँ रचनात्मक र पृथक् कार्यक्रम गरी स्थापित आदर्श स्कुलले सोही कार्यक्रममा होटेल म्यानेजमेन्ट तथा हस्पिटालिटीको क्षेत्रमा झापाकै अग्रज शिक्षक नीरज श्रेष्ठलाई सम्मान गरेको थियो । उनलाई होटेल व्यवस्थापन संकायका लागि झापाको अग्रणी शिक्षक मानिन्छ । श्रेष्ठलाई दोसल्ला ,मेडल र सम्मानपत्रद्वारा सम्मान गरिएको थियो ।

उक्त अवसरमा विभिन्न विधामा अग्रता हासिल गरेका कक्षा ११ का विद्यार्थीलाई सम्मान समेत गरिएको थियो। स्कुलका संस्थापक तथा डाइरेक्टर सन्जोग खरेलको अध्यक्षतामा भएको कार्यक्रममा स्कुलकी एकाडेमिक कोअर्डिनेटर विजया भण्डारीले स्वागत गरेकी थिइन् । कार्यक्रममा निदि क्याम्पसका प्रमुख रञ्जित शाह ,युवा होटेल व्यवसायी सौरभ प्रसाईँ तथा स्कुलका शिक्षकहरूको आतिथ्य रहेको थियो । कार्यक्रममा विद्यार्थीले नाचगान,नाटकजस्ता प्रस्तुति प्रस्तुत गरेको स्कुलका आउटरिच कोअर्डिनेटर दीपक दासले जानकारी दिए।