डोटीको जोरायल गाउँपालिका-२ बुडरमा रहेको सब डिभिजन वन कार्यालयका प्रमुख सहायक वन अधिकृत भक्तराज गिरी ५ हजार घुससहित पक्राउ परेका छन्। निजी आवादी जमिनबाट संकलित दाउराको छुट पुर्जी बनाउँदा स्थानीय व्यवसायी गणेश भण्डारीबाट पाँच हजार रकम लिँदै गर्दा स्थानीय बासिन्दाले उनलाई रङ्गेहात नियन्त्रणमा लिई इलाका प्रहरी कार्यालय बुडरको जिम्मा लगाएका हुन्।

दाउरा व्यवसायी भण्डारीका अनुसार स्थानीय जयानन्द ओझाको लालपूर्जा भएको जमिनबाट कानुनी प्रक्रिया पूरा गरी संकलित दाउराको निकासीका लागि पटक पटक छुटपुर्जी माग गर्दा दाउराको प्रति के.जी.का हिसाबले रकम माग गरेपछि रु. १० हजार यस अगावै लिइसकेको बताए। त्यति गर्दा पनि सबै कर्मचारीलाई मिलाउनुपर्छ भन्दै फेरि रकम माग गरेपछि आज ५ हजार लिने क्रममा स्थानीयले नियन्त्रणमा लिई प्रहरीलाई बुझाएको बताए।