झापा गाउँपालिका पछिल्लो समय प्रतिबन्धित लागुऔषध ब्राउन सुगर ओसारपसार गर्ने 'ट्रान्जिट पोइन्ट' बन्दै गइरहेको छ। भारतको बिहारसँग सिमाना जोडिएको यस गाउँपालिकाबाट दिनहुँ जसो ब्राउन सुगर प्रयोगकर्ता र कारोबारी पक्राउ पर्न थालेका छन् । यसैक्रममा बुधवार साँझ सशस्त्र प्रहरी बल बोर्डर आउट पोस्ट टाघनडुब्बाका इन्स्पेक्टर दीपेन्द्रमणि राईको कमान्डमा खटिएको सशस्त्रको टोलीले ब्राउन सुगरसहित दुई युवकलाई पक्राउ गरेको छ । 

पक्राउ पर्नेहरूमा बिर्तामोड नगरपालिका- १ का २७ वर्षीय निश्चल सुवेदी र झापा गाउँपालिका- २ स्थित कुवाडीका १९ वर्षीय शिव कामती रहेको सशस्त्र प्रहरीले जनाएको छ। को ३४ प ७८७६ नम्बरको मोटरसाइकलमा सवार उनीहरूमाथि शङ्का लागि सशस्त्र प्रहरीले चेकजाँच गर्दा २ ग्राम ब्राउन सुगर जस्तो देखिने लिसाइलो पदार्थ बरामद गरेको थियो ।

पक्राउ परेका दुवै जनालाई आवश्यक कारबाहीका लागि नेपाल प्रहरीलाई बुझाइएको जनाइएको छ ।  गत आइतबार मात्र सशस्त्र प्रहरीले झापा १ स्थित बेलायतीवारि सीमा इलाकाबाट ५० ग्राम लागुऔषध ब्राउन सुगर सहित तीन जनालाई पक्राउ गरेको थियो । पक्राउ पर्नेहरूमा मोरङ जिल्ला उर्लाबारी नगरपालिका-७ का २७ वर्षीय विनोद लिम्बू, सोही नगरपालिका-१० का २६ वर्षीय सुरेश धिमाल र झापा गौरादह नगरपालिका-४ का २५ वर्षीय सन्देश लिम्बू रहेका थिए ।