शरणामती । झापा गाउँपालिकाका कृषकहरूले खेतमा सिचाइका लागि लगाइएको पानी तान्ने मोटर चोरी हुने थालेको छ । धान सकिएर मकै बाली लगाउने सिजनमै मोटर चोरीका घटना बढेपछि स्थानीय कृषक हैरानसँगै मारमा परेका छन् । 

झापा गाउँपालिका-६ स्थित भृकुटी चोकबाट मात्रै केही दिनमै खेतमा बोडिङ गरेर जडान गरिएका तीन मोटर चोरी भएको छ । 'सोमबार सम्म मोटर खेतमै थियो आज गएर हेर्दा मोटर चोरी भएको रहेछ,' स्थानीय कृषक नैनकला पौडेलले बताइन् ।

यता मोटर चोरी गर्ने गिरोहमाथि निगरानीमा बढाएको शरणामती प्रहरी चौकीका इन्चार्ज तथा प्रहरी सहायक निरीक्षक वीरबहादुर भण्डारीले बताए। प्रहरीमा अहिले सम्म १२ वटा चोरीका घटनाको उजुरी परेको उनले बताए ।

प्रहरीले घटनाको बारेमा सूक्ष्म रुपमा अनुसन्धान गरिरहेको बताउँदै उनले भने, 'चोरी गर्ने गिरोह पत्ता लगाएर कानुनी दायरमा ल्याएर छाड्छौ ।'  दुई वर्ष अघि पनि झापा- ७ स्थित मदरगाछमा मोटर चोरीका घटनामा संलग्न गिरोहलाई मोटर सहित प्रहरीले पक्राउ गरेको थियो।