पोर्चुगल पठाइदिने लोभमा पारेर ठगी धन्दा चलाउने एक व्यक्ति समातिएका छन् । पक्राउ पर्नेमा झापा घर भई हाल भक्तपुर बस्ने ३८ वर्षीय सञ्जीव आचार्य रहेका छन् । उनले पोर्चुगल पठाइदिने भन्दै चार जनाबाट २७ लाख ठगेको आरोप लागेको छ ।

वर्किङ भिसामा वैदेशिक रोजगारीका लागि पोर्चुगल पठाउने र त्यहाँ पुगेपछि प्रतिष्ठित कम्पनीमा फुड्स किपिङको काम लगाइदिने लोभ देखाएर आचार्यले लाखौँ रकम लिएको पीडितले बताएका छन् । रकम लिएर उनी सम्पर्कविहीन भएपछि पीडितहरूले वैदेशिक रोजगार विभागमा उजुरी दिएका हुन् ।

प्रहरी टोलीले उनलाई आज भक्तपुरको गठ्ठाघरबाट नियन्त्रणमा लिएको हो । थप अनुसन्धान तथा कारबाहीका लागि अभियुक्त आचार्यलाई वैदेशिक रोजगारी विभागमा पठाइएको प्रहरीले जनाएको छ ।