भद्रपुर। भद्रपुरस्थित मेची कोभिड उपचार केन्द्रमा रहेका संक्रमित बिरामीहरूले समयमा खाना खान नपाउँदा रोगभन्दा भोकले मर्ने अवस्था आएको गुनासो गरेका छन् । अति आवश्यक खानपानको व्यवस्थापकीय कमजोरीले गर्दा अस्पतालमा उपचाररत बिरामीले रोगभन्दा भोकले मर्नु पर्ने अवस्था आएको भन्दै भिडियो मार्फत सार्वजनिक अपिल गरेका हुन् ।
कोभिड १९ सङ्क्रमणले सिकिस्त भएका बिरामी मात्र उपचारका लागि पुग्ने गरेको कोरोना विशेष अस्पतालमा व्यवस्थापकीय लापरबाहीले गर्दा भोक सहेर बस्न नसकिने अवस्थामा पुगेको उनीहरूले फेसबुक मार्फत सार्वजनिक गर्न थालेका छन् ।
अस्पतालमा रहेका बिरामीहरूका अनुसार कोभिड अस्पतालमा बिहानको नास्ता ९ बजेपछि र खाना मध्यान्ह १ बजेपछि आउने गरेको छ । बिरामीहरूका लागि खाने, बस्ने व्यवस्थापन कमजोर रहेको, अस्पतालमा उचित सरसफाइ र पोषणयुक्त खानाको व्यवस्थापन कमजोर रहेको गुनासो छ । अस्पतालमा रहेका बिरामीहरूले भिडियो मार्फत रोगबाट छिटो छुटकारा पाउन समयमा खाना पाउने वातावरण बनाइदिन सरोकारवालासित आग्रह गरेका छन् ।

सङ्क्रमितको शव नउठाउँदा बिरामीहरू त्रसित
मेची अस्पतालमा गए राति कोरोनाका कारण मृत्यु भएका व्यक्तिको शव नउठाएकोले त्यहाँ उपचारार्थ कोरोना संक्रमित त्रसित बनेका छन् । पाँचथरबाट उपचारका लागि जेठ ५ गते ल्याइएका ६० वर्षीय कोरोना संक्रमित पुरुषको गए राति मृत्यु भएको हो । उनको शव बेडमै बेवारिसे हालतमा रहिरहेको त्यहाँ उपचाररत एक बिरामीले जानकारी।