भद्रपुर । भद्रपुरमा थप एक कोरोना सङ्क्रमितको मङ्गलवार मृत्यु भएको छ । मृत्यु हुनेमा भद्रपुर ४ मन्त्री बस्ती निवासी ४८ वर्षीय पुरुष रहेको भद्रपुर नगरपालिकाका फोकल पर्सन मनोज भट्टराईले जानकारी दिए । उनको मेची कोभिड उपचार केन्द्र भद्रपुरमा मृत्यु भएको हो । संक्रमण पुष्टि भएका ती पुरुष एक साता होम आइसोलेसनमा बसेका थिए । श्वासप्रश्वासमा समस्या आएपछि उनलाई परिवारजनका सदस्यले मङ्गलवार उपचारका लागि बिएण्डसी अस्पताल बिर्तामोड लगेका थिए । त्यहाँ भर्ना लिन नमानेपछि उनलाई मेची कोभिड उपचार केन्द्र ल्याएको र केन्द्रमा राख्ने बित्तिकै उनको मृत्यु भएको पारिवारीक स्रोतले जनाएको छ ।

योसँगै भद्रपुरमा कोरोनाबाट तीन जनाको ज्यान गइसकेको छ । यता भद्रपुरमा मङ्गलवार २९ महिला र ३५ पुरुष गरी ६४ जनामा कोरोना संक्रमण पुष्टि भएको छ । नगर स्वास्थ्य शाखाका अनुसार ६० जनाको पिसीआर र चार जनाको एन्टिजेन माध्यमबाट पुष्टि भएको हो । जसमध्ये वडा नम्बर २ का १ महिला र १ पुरुष, वडा ५ का ३ महिला र ५ पुरुष, वडा ६ का १ पुरुष, वडा ७ का ७ महिला र १० पुरुषवडा ८ का ८ महिला र ६ पुरुष, वडा ९ का ३ महिला र २ पुरुष, वडा १० का २ महिला र ६ पुरुष र  वडा उल्लेख नगरिएको ४ महिला र ३ पुरुष रहेका छन् ।