२०८१ जेष्ठ १३ गते , आईतबार

झापाका रेल्वे प्रभावितलाई चलनचल्तीकै मूल्यसहित छिट्टै मुआब्जा वितरण

sajilo news
पार्थ मण्डल
२०७७ चैत्र १२ गते , विहीबार
झापाका रेल्वे प्रभावितलाई चलनचल्तीकै मूल्यसहित छिट्टै मुआब्जा वितरण

बिर्तामोड । जिल्ला प्रशासन कार्यालय झापाले रेल्वे प्रभावितहरूलाई मुआब्जा वितरणका लागि आवश्यक तयारी अन्तिम चरणमा पुर्‍याएको छ । झापाका प्रमुख जिल्ला अधिकारी श्रवणकुमार तिमिल्सिनाले रेल्वे प्रभावितका लागि मुआब्जा वितरण गर्न जग्गा तथा संरचनाको मूल्याङ्कन गर्ने कार्य सकिएको बताएका छन् ।

बिर्तामोडस्थित संवाद समूहको कार्यालयमा बिहीबार प्रजिअ तिमिल्सिनासहित सुरक्षा निकायका प्रमुखहरूबिच भएको छलफलमा त्यस्तो बताइएको हो ।   रेल्वे प्रभावितहरूको माग र सङ्घर्षप्रति लक्षित उनले केही समय धैर्य गर्न प्रभावितहरूलाई आग्रह गरे । प्रभावितहरूको चित्त बुझ्ने गरी मुआब्जामा चलन–चल्तीको मूल्य दिन मूल्याङ्कन गरी प्रशासनले तयारी गरेको छ ।

 ‘चलन–चल्तीको मूल्यभन्दा कम नहुने गरी मुआब्जा दिन मूल्याङ्कनको काम सकिएको छ’– प्रजिअ तिमिल्सिनाले भने– ‘त्यस बारे चैत अन्तिमसम्ममा निर्णय गरी ३५ दिने सूचना जारी गरेर प्रभावितको निवेदनका आधारमा मुआब्जा वितरण गरिनेछ ।’ आगामी वैशाखमा मुआब्जा वितरण सुरु हुने उनले बताए । झापा, मोरङ र सुनसरीमा एकै पटक मुआब्जा वितरण गर्ने बुझिएको छ । झापाको छ पालिकाका २५ वडामा मुआब्जा वितरण गरिने बताइएको छ । उक्त कार्यका लागि उपसमितिले आवश्यक सबै काम सम्पन्न गरेको प्रजिअ तिमिल्सिनाले बताए । स्रोतका अनुसार तीन जिल्लामा करिब १५ अर्ब रुपैयाँ मुआब्जामा खर्च हुनेछ ।

प्रजिअ तथा सुरक्षा प्रमुखहरूबिच कोभिड–१९को दोस्रो लहर र झापामा आवश्यक सुरक्षा सतर्कता अपनाउने,  विपद्को पूर्व तयारी, लागू औषध लगायत जिल्लाका विविध समस्यामा छलफल भएको थियो ।

विषयगत तथा सरोकार राख्ने विषयमा संवाद, छलफल र समन्वयको काम गरिदिन संवाद समूहलाई प्रजिअ तिमिल्सिनाले आग्रह समेत गरेका छन् ।

खुल्ला सीमाका कारण भइरहेका घटना र चुनौती, लागू औषध, आत्महत्या, बढ्दो अपराध, दुर्घटना लगायतका विषयमा तथ्यांकसहित छलफल भएको थियो भने न्यूनीकरणका लागि जनचेतनामा जोड दिइएको थियो ।

 छलफलमा नयाँ श्रीनाथ गण चारआलीका प्रमुख सेनानी अमर जङ्ग थापा, जिल्ला प्रहरी कार्यालय झापाका प्रमुख प्रहरी उपरीक्षक सानुराम भट्टराई, सशस्त्र प्रहरी बल २ नं। गण झापाका सशस्त्र प्रहरी उपरीक्षक रमेशकुमार पाण्डे र जिल्ला अनुसन्धान कार्यालयका उपअनुसन्धान निर्देशक तिलक शर्मा प्रसाईँले जिल्लाको वस्तुस्थितिको बारेमा जानकारीसहित अबका दिनमा गर्नुपर्ने कार्य बारे बताउँदै विभिन्न सुझाव दिएका थिए ।

कोभिड–१९ नियन्त्रणका लागि राजनीतिक दल, सुरक्षा प्रशासन, सामाजिक संस्था बिचको समन्वयबाट विगतमा झैँ प्रभावकारी अभियान सञ्चालन गर्न सबैको जोड थियो । झापामा शान्ति स्थापना र विभिन्न समस्या समाधानमा विगत देखि संवाद समूह र राजनीतिक दलले निर्वाह गरिरहेको भूमिकाको प्रजिअ तिमिल्सिनासहित सुरक्षा प्रमुखहरूले प्रशंसा गरेका थिए । रेल्वे प्रभावितको सङ्घर्ष र समस्या समाधानमा संवादले सहजीकरण गरी पुलको काम गरिरहेको बारे पनि चर्चा भएको थियो ।

सम्बन्धित समाचार