भोजपुरमा भदौरे मेला घुम्न पुगेका खोटाङ घर भएका एक जना शिक्षकको कुटपिटबाट मृत्यु भएको छ । साल्पासिलिछो गाउँपालिका–५ मा लागेको मेलामा खोटाङको केपिलासगढी गाउँपालिका–७ सुँदेलका ३९ वर्षीय शिक्षक भानुभक्त राईमाथि कुटपिट भएको थियो ।

प्रहरीका अनुसार भदौ ११ गते पुरानो रिसिइबिका कारण राईमाथि कुटपिट भएको प्रारम्भिक अनुसन्धानबाट खुलेको छ । कुटपिटका क्रममा ढुङ्गासमेत प्रहार गरिएको प्रहरीले जनाएको छ।

घटनामा संलग्न रहेको आरोपमा प्रहरीले ११ जनालाई पक्राउ गरेको छ । पक्राउ पर्नेमा केपिलासगढी –७ का २१ वर्षीय सागर कोयी राई, २१ वर्षीय प्रतीक राई, २५ वर्षीय निशान राई, २३ वर्षीय सुशील राई, ३२ वर्षीय अमर राई, ३० वर्षीय उमेश दुमी राई, ३५ वर्षीया तारादेवी राई, ४८ वर्षीया सुमिता राई, ४३ वर्षीया तेजकुमारी राई, १९ वर्षीया देविका राई र २० वर्षीया चन्द्रकला राई छन् ।

पक्राउ परेकाहरू विरुद्ध जिल्ला अदालत भोजपुरबाट पाँच दिनको म्याद थप गरिएको छ । घटनाको थप अनुसन्धान भइरहेको जिल्ला प्रहरी कार्यालय भोजपुरले जनाएको छ ।