पूर्व-पश्चिम राजमार्ग अन्तरगत झापाको दुर्गापुरमा मोटरसाइकलको ठक्करबाट पैदल यात्री एक महिलाको मृत्यु भएको छ ।

मृत्यु हुनेमा अर्जुनधारा नगरपालिका –९ निवासी ५० वर्षीया मिरादेबी गौतम रहेको जिल्ला प्रहरी कार्यालय झापाले जनाएको छ । प्रहरीका अनुसार आज दिउँसो ४ बजे कनकाई नगरपालिका–७ स्थित दुर्गापुर बजारमा दुर्गापुरबाट सुरुङ्गातर्फ जाँदै गरेको प्र।१–०१–०१ प ३९२९ नम्बरको मोटरसाइकलले बाटो काट्दै गरेकी पैदलयात्री गौतमलाई ठक्कर दिएको थियो ।

घाइतेलाई उपचारको लागि बीएण्डसी अस्पताल बिर्तामोड पठाइएको र उनको उपचारको क्रममा दिउँसो ४ः५० बजे मृत्यु भएको थियो । यता मोटरसाइकल चालक ताप्लेजुङ आठराई त्रिवेणी गाउँपालिका ३ का ३१ वर्षीय गोपाल रम्तेल सामान्य घाइते भएका छन् । अनुहारमा चोट लागेका रम्तेललाई सुरुङ्गास्थित स्थानीय मेडिकलमा उपचारपश्चात् इलाका प्रहरी कार्यालय सुरुङ्गाले नियन्त्रणमा लिएको छ ।