मिडफिल्डर स्टेफन इउस्टाकियोले खेलको अन्तिम समयमा गरेको सानदार गोलको मद्दतले क्यानडाले फिफा विश्वकपमा दक्षिण अफ्रिकामाथि १-० को रोमाञ्चक जित दर्ता गरेको छ। 

लस एन्जलसमा आइतबार खेलिएको प्रतिस्पर्धात्मक खेलमा जित निकाल्दै मुख्य प्रशिक्षक जेसी मार्सको टोली क्यानडाले अन्तिम १६ (Round of 16) मा आफ्नो स्थान सुरक्षित गरेको हो। क्यानडाले अब ह्युस्टन स्टेडियममा नेदरल्यान्ड्स र मोरक्कोबीचको विजेतासँग प्रतिस्पर्धा गर्नेछ।

खेलको पहिलो हाफमा दक्षिण अफ्रिकाले केही आकर्षक र आक्रामक मुभहरू बनाए पनि फाइनल पास र फिनिसिङमा चुकेको थियो। पहिलो हाफको अन्तिम क्षणमा क्यानडाले लगातार दुईवटा गोल गर्ने  अवसर गुमाएको थियो। 

मोइस बोम्बिटोको उत्कृष्ट हेडरलाई दक्षिण अफ्रिकाका अब्रे मोडिबाले गोललाइनबाट क्लियर गरे भने त्यसको लगत्तै ताजोन बुखाननको प्रहारलाई गोलकिपर रोनवेन विलियम्सले उत्कृष्ट बचाउ गरे।

दोस्रो हाफ सुरु भएदेखि नै क्यानडाले खेलमा आफ्नो नियन्त्रण जमायो। टानी ओलुवासेयीको प्रहारलाई दक्षिण अफ्रिकी किपर विलियम्सले उत्कृष्ट ढङ्गले रोकेका थिए भने रिबाउन्डमा बल आउनुअघि नै एम्बेकेजेली म्बोकाजीले बललाई क्लियर गरिदिए। 

खेलको ७५ औं मिनेटमा स्टार खेलाडी अल्फान्सो ड्याभिस मैदान प्रवेश गर्दा रंगशालामा दर्शकले ताली बजाएर स्वागत गरेका थिए। ड्याभिसले आफ्नो गति र ड्रिब्लिङ सीपले दक्षिण अफ्रिकी डिफेन्सलाई लगातार दबाबमा राखे।

खेल अतिरिक्त समय (एक्स्ट्रा टाइम) तर्फ धकेलिने निश्चित देखिइरहेका बेला, खेलको ९०+२ मिनेटमा इउस्टाकियोले जादुमयी प्रदर्शन गरे। डिपिबक्सको छेउमा बाउन्स भइरहेको बललाई परफेक्ट टाइमिङका साथ प्रहार गर्दै उनले बललाई सिधै नेटको तल्लो कुनामा छिराए। उनको सोही प्रहार नै खेलको एकमात्र र निर्णायक गोल साबित भयो।

दक्षिण अफ्रिका यस प्रतियोगिताबाट बाहिरिए पनि आफ्नो इतिहासमा पहिलो पटक विश्वकपको नकआउट चरणमा पुगेर गर्वका साथ घर फर्किएको छ।

७४ वर्ष ७९ दिनका दक्षिण अफ्रिकी प्रशिक्षक ह्युगो ब्रोस विश्वकपको नकआउट चरणमा टोलीको नेतृत्व गर्ने इतिहासकै सबैभन्दा जेठो प्रशिक्षक बनेका छन्। यसअघि सन् २०१८ मा उरुग्वेका ओस्कार ताबारेज (७१ वर्ष) को नाममा यो रेकर्ड थियो।