विराटनगर विमानस्थल हुँदै काठमाडौं उड्न लागेका दुई जना यात्रु ठूलो रकमसहित पक्राउ परेका छन् । स्रोत नखुलेको करिब २७ लाख रुपैयाँसहित पक्राउ पर्नेमा एक जना भारतीय नागरिक पनि छन् । 

मोरङ प्रहरीका डीएसपी कोपिला चुँडालका अनुसार शनिबार दिउँसो करिब ३:३५ बजे नियमित सुरक्षा जाँचका क्रममा भारतको माल्दा जिल्ला सुजागञ्जका ३६ वर्षीय मोहिदिल अलीलाई पक्राउ गरिएको छ । उनी श्री एयरलाइन्सको उडानमार्फत काठमाडौं जान लागेका थिए । अलीले बोकेको झोलाभित्र नेपाली १५ लाख ९८ हजार रुपैयाँ फेला परेको डीएसपी चुँडालले बताइन् । 

त्यसैगरी, एक दिनअघि शुक्रबार राति करिब ८ बजे बुद्ध एयरको उडानमार्फत काठमाडौं जान लागेका सुनसरीको धरान उपमहानगरपालिका–१८ का ३५ वर्षीय दिलिप तामाङ पनि पक्राउ परेका छन् । तामाङको साथबाट ११ लाख रुपैयाँ बरामद भएको प्रहरीले जनाएको छ ।

प्रहरीका अनुसार दुवै जनाबाट जम्मा २६ लाख ९८ हजार रुपैयाँ बरामद भएको छ । स्रोत नखुलेको यति ठूलो रकम भेटिएपछि दुवैलाई नियन्त्रणमा लिएर थप अनुसन्धानका लागि जिल्ला प्रहरी कार्यालय मोरङमा राखिएको डीएसपी चुँडालले बताइन् । ‘ठूलो रकम बोकेर यात्रा गर्दा त्यसको वैध स्रोत खुलाउनुपर्छ,’ उनले भनिन्, ‘स्रोत पुष्टि गर्न नसकिएमा शंकास्पद मानिन्छ र अनुसन्धान अगाडि बढाइन्छ ।’

नेपालमा नगद बोकेर यात्रा गर्न पूर्ण प्रतिबन्ध नभएपनि असामान्य रूपमा ठूलो रकम भेटिएमा त्यसको वैधता प्रमाणित गर्नुपर्ने कानुनी व्यवस्था रहेको छ । बैंकिङ प्रणालीलाई प्राथमिकता दिन आग्रह गरिँदै आएको अवस्थामा धेरै नगदमा बोकेर हिँड्दा राजस्व छली, हुण्डी कारोबार वा अन्य गैरकानुनी गतिविधिसँग सम्बन्ध हुनसक्ने आशंकामा प्रहरीले कडाइ गर्ने गरेको छ । प्रहरीले दुवै व्यक्तिको आर्थिक पृष्ठभूमि, सम्भावित संलग्नता र रकमको वास्तविक स्रोतका बारेमा पत्ता लगाउन विस्तृत अनुसन्धान गरिरहेको छ ।