धनकुटाको पाख्रीबास नगरपालिकामा करेन्ट लागेर एक किशोरको मृत्यु भएको छ। बुधबार बिहान पाख्रीबास नगरपालिका–५ चौतरास्थित जंगलमा दाउरा काट्न गएका १४ वर्षीय बादल तामाङको करेन्ट लागेर घटनास्थलमै मृत्यु भएको हो।

मृतक तामाङ पाख्रीबास–५ कै गैरी गाउँ बस्ने लोक बहादुर तामाङका छोरा हुन्। प्रहरीका अनुसार जंगलमा रहेको विद्युत पोललाई सपोर्टका लागि भुईँमा गाडिएको तारमा छोइँदा करेन्ट लागी घटना भएको प्रहरीले जनाएको छ।

घटनाबारे जानकारी प्राप्त हुनासाथ प्रहरी टोली घटनास्थलमा खटिएर स्थल सुरक्षित राखी प्रारम्भिक अनुसन्धान गरिरहेको छ।

घटनासँग सम्बन्धित प्राविधिक पक्षको अनुसन्धानका लागि नेपाल विद्युत प्राधिकरण धनकुटाका प्रतिनिधि समेत घटनास्थलमा पुगेका छन्। घटनाबारे आवश्यक अनुसन्धान तथा कानुनी प्रक्रिया जारी रहेको धनकुटाका प्रहरी प्रमुख एसपी शरतकुमार थापा क्षेत्रीले जानकारी दिए।