ताप्लेजुङको पाथीभरा दर्शन गर्न जाँदै गरेको जीपमा करेन्ट लाग्दा ज्यान गुमाएका भद्रपुरका तीन जनाको शव आज दिउँसो घर ल्याइने भएको छ ।

हिजो तीनै जनाको शवलाई ताप्लेजुङमा पोस्टमार्टम गरी आज बिहान त्यहाँबाट हिँडाइएको सहयोगी विकास कोइरालाले जानकारी दिए । सो घटनापछि भद्रपुर यतिवेला शोकमग्न भएको छ ।ताप्लेजुङमा सडकमा लत्रिएको बिजुलीको तारमा छोएर जीपमा आगो लाग्दा झापा भद्रपुरका तीनसहित चार जनाको मृत्यु भएको हो । दुर्घटनामा परी थप दुई जना घाइते भएका छन्। मृत्यु हुनेहरूमा भद्रपुर ८ निवासी ७० वर्षीय विनोद पौडेल, उनकी श्रीमती ६९ वर्षीया सरिता पौडेल र उनीहरूकै नातिनी (छोरीको छोरी) हाल ललितपुर निवासी १६ वर्षीया आध्या आचार्य र जीप चालक फुङलिङ नगरपालिका वडा न. १० का ४२ वर्षीय दुर्गा भट्टराई रहेका छन् ।

दुर्घटनामा घाइते भएकी ४५ वर्षीया सबिना आचार्य र उनका छोरा ९ वर्षीय भबिमय आचार्य (मृतक पौडेल दम्पतीका छोरी र नाति) लाई उपचारका लागि काठमाडौँ लगिएको छ । भद्रपुरबाट आफ्नो सवारी साधन लिई उनीहरू ताप्लेजुङ गएका थिए ।

हिजो बिहान ताप्लेजुङबाट पाथीभरा दर्शन गर्न होटेलमार्फत बुक भएको अर्को भाडाको गाडी लिएर जाँदै गर्दा सो दुर्घटना भएको हो । यात्रु लिएर पाथीभरातर्फ जाँदै गरेको मे १ ज ३०११ नम्बर को जीप पाथीभरा क्षेत्रको सेवारो चोकमा हिजो बिहान ४.१५ बजेतिर दुर्घटनामा परेको थियो।