सौर्य एयरलाइन्सको जहाज दुर्घटनामा मृत्यु भएका १८ जनामध्ये एक जना सौर्य एयरलाइन्सका अध्यक्ष दीपक पोख्रेलका भान्जा आश्विन निरौला रहेको थाहा भएको छ ।

पारिवारिक स्रोतका अनुसार आश्विन निरौला एरोनोटिकल इन्जिनियर थिए । जहाजलाई मर्मतका लागि पोखरा लैजाने क्रममा काठमाडौँबाट उड्ने बित्तिकै आज बिहान ११ बजेर ११ मिनटमा दुर्घटना भएको थियो ।

भद्रपुर निवासी अध्यक्ष पोख्रेलका पाँच जना बहिनीमध्ये जेठी बहिनी कल्पना निरौलाको एक मात्र छोरा थिए इन्जिनियर आश्विन । एरोनोटिकल इन्जिनियरिङको अध्ययन पूरा गरेपछि उनी सौर्य एयरलाइन्समा सुरुदेखि नै कार्यरत थिए ।
हाल एयरलाइन्सका अध्यक्ष पोख्रेल त्रिभुवन विमानस्थलको घटनास्थलमा छन् भने दिवङ्गत इन्जिनियर आश्विन निरौलाका बुवा र आमा अस्ट्रेलियामा छन् । घटनाको खबर थाहा पाउने बित्तिकै उनका बुवा र आमा नेपाल फर्किने क्रममा रहेको जानकारी प्राप्त भएको छ ।