न्यूरोड टिम (एनआरटी) लाई सहिद स्मारक 'ए' डिभिजन लिगको जित दिलाउन महत्वपूर्ण योगदान पुराएका गम्भीर राईलाई भद्रपुर झापा गोल्डकप आयोजक समितिले लाइफटाइम एचिभमेन्ट अवार्ड प्रदान गरेको छ । 
२०२५ साल फागुन ५ गते जन्मिएका पूर्व फुटबलर राईलाई प्रथम भद्रपुर झापा गोल्डकपको फाइनल खेलअघि लाइफटाइम एचिभमेन्ट अवार्डसँगै एक थान टिभिएस मोटरसाइकल प्रदान गरिएको छ । १४ वर्षदेखि फुटबल खेलमा आवद्ध झापा भद्रपुरका राई यु १६, यु १९ र नेपाल युथ फुटबल टिमको सदस्य पनि थिए । उनी एनआरटी, जनकपुर चुरोट कारखाना र मनाङ मस्र्याङ्दीजस्ता चर्चित क्लबमा आवद्ध रही अन्तर्राष्ट्रिय तीन गोल पनि गरेका थिए । झापा जिल्ला फुटबल संघको उपाध्यक्ष र सदस्य पदमा रहिसकेका सम्मानित राईले २०५६ सालमा सन्यास लिएका थिए । उनले स्थानीय क्लब मुनाल एफसीको प्रशिक्षकको भूमिका निर्वाह गरिसकेका छन् ।  फुटबल खेलको सुदृढिकरण र विकासमा महत्वपूर्ण योगदान पुराएको उल्लेख गर्दै भद्रपुर झापा गोल्डकपले लाइफटाइम एचिभमेन्ट अवार्ड प्रदान गरेको जनाएको छ ।