झापा कनकाई नगरपालिकास्थित जामुनखाडी सिमसार क्षेत्रमा निमार्णाधिन जामुनखाडी प्राकृतिक रंगशालामा भएको हर्क राई स्मृति नकआउट फुटबल प्रतियोगिताको उपाधि जलथल फुटबल क्लबले उचालेको छ । 

आज भएको फाइनल खेलमा उपाधिका लागि एपिएफ पकली र जलथलबीच प्रतिस्पर्धा भएको थियो । निर्धारित समय अवधि सम्ममा दुबै तर्फबाट दोस्रो हाफमा १-१ गोलको बराबरी भएपछि खेलको अन्तिम निर्णय ट्राईब्रेकरबाट भएको थियो । ट्राईब्रेकरमा ५-४ गोल अन्तरले पकलीलाई पराजित गर्दै जलथलले उपाधि चुमेको हो ।

उपाधि चुमेसँगै जलथलले नगद १ लाख ११ हजार सहित ट्रफि, मेडल र प्रमाण पत्र प्राप्त गरेका छन् । कार्यक्रमका प्रमुख अतिथि कनकाई नगरपालिकाका प्रमुख राजेन्द्रकुमार पोखरेलले विजेतालाई प्रथम पुरस्कार हस्तान्तरण गरे भने उपविजेता पकलीलाई राई परिवारका सदस्य दिलीप राईबाट नगद रु ५५ हजार सहित ट्रफि, मेडल र प्रमाण पत्र हस्तान्तरण गरिएको थियो ।

खेलको म्यान अफ दि म्याच साथै प्लेयर अफ दि टुर्नामेण्टको उपाधि क्रमशः जलथलका गोलकिपर समीर लिम्बू र हर्क लिम्बूले प्राप्त गरे । स्वर्गीय हर्क राईकी श्रीमतीले दुवै जना खेलाडीलाई नगद , ट्रफी र प्रमाण पत्र प्रदान गरिन् । यसैगरी सर्वाधिक गोलकर्ताको पुरस्कार एफिएफ पकलीका जर्सी नम्बर—४ का अरविन्द चौधरीले नगद रु ११ हजार १ सय ११ प्राप्त गर्न सफल भए । कार्यक्रमका अवसरमा खेललाई विभिन्न विधामा सहयोग पुर्‍याउने सङ्घसंस्था र व्यक्तिहरूलाई सम्मान पत्रले सम्मान गरेको कनकाई—२ का वडाअध्यक्ष बलराम राईले जानकारी दिए । सो प्रतियोगितामा झापा, मोरङ र सुनसरीका ८ वटा टिमले सहभागिता जनाएको थियो ।