धनकुटाबाट तरकारी लिएर जनकपुरतर्फ जाँदै गरेको पिकअप गाडीभित्र सशस्त्र प्रहरीले बुधबार बिहान ठूलो परिणाममा गाँजा फेला पारेको छ।

पूर्व–पश्चिम लोकमार्गअन्तर्गत सुनसरीको कोसी गाउँपालिका–३ मा को १ च ८५२५ नम्बरको पिकअप रोकेर खानतलासी गर्दा लागुऔषध गाँजा बरामद भएको सशस्त्र प्रहरी बल प्रदेश १ का प्रमुख डीआईजी कमल गिरीले जानकारी दिए। उनका अनुसार सशस्त्र प्रहरी बल सुनसरीका प्रमुख एसपी विक्रम होमागाईं र निर्वाचन सुरक्षाका लागि खटिएको सशस्त्रका इन्सपेक्टर भूपेन्द्रकाजी निरौला नेतृत्वको संयुक्त टोलीले बिहान ४ बजेतिर गाँजा बरामद गरेको हो। 

पिकअपबाट २ सय १७ किलो गाँजा बरामद भएको सशस्त्रले जनाएको छ। पिकअपमा बन्दाकोभी लोड गरिएको थियो। माथिबाट बन्दाकोभीले छोपेर ८ वटा बोराभित्र प्याक गरी लैजाँदै गरेको अवस्थामा गाँजा बरामद गरिएको गिरीले बताए। सशस्त्रले पिकअपसहित गाँजा र तरकारी नियन्त्रणमा लिएको छ।

चेकजाँच सुरु हुनसाथ पिकअप छाडेर चालक फरार बनेका छन्। चालकको खोजी तीव्र पारिएको सशस्त्रले जनाएको छ। नियन्त्रणमा लिइएको पिकअप, बरामद गरिएको गाँजा र तरकारी सशस्त्रले आवश्यक अनुसन्धानका लागि नेपाल प्रहरीको जिम्मा लगाउने तयारी गरिरहेको छ।