तिहार तथा छठ पर्वको अवसर पारेर मेची महाकाली बुहारी संयुक्त आवाज झापाले सुस्त मनस्थिति सरोकार समाज कनकाई– मा आश्रित बालबालिकालाई खाद्यान्न एवं दैनिक उपभोग्य सामग्री हस्तान्तरण गरेको छ ।

बुहारी संयुक्त आवाजका झापा जिल्ला अध्यक्ष शिखा खड्का गणेशको नेतृत्वमा पदाधिकारी, सदस्य एवं आजीवन सदस्यहरूको टोलीले चामल , दाल तेल , नुन , चिनी, आलु सोयाविन, चाउचाउ, बिस्कुट लगायतका खाद्यान्न सामग्री र  भाडा धुने साबुन , नुहाउने , लुगा धुने लगायतका १५ हजार मूल्य बराबरको उपभोग्य सामग्री हस्तान्तरण गरेको हो ।

संस्थाका अध्यक्ष एवं सञ्चालक शान्ता पोखरेललाई अध्यक्ष खड्कासहितको टोलीले उक्त सामग्री हस्तान्तरण गरेको थियो । कार्यक्रममा संस्थाका उपाध्यक्ष गङ्गा भट्टराई, सचिव कविता थापा, सहसचिव अम्बिका गिरी, कोषाध्यक्ष परूँ सुवेदी लगायत सदस्य र आजीवन सदस्यहरूको सहभागिता रहेको थियो ।

पूर्ण अपाङ्ग, आंशिक अपाङ्ग एवं सुस्त मनस्थिति भएकासहित गरी सुस्त मनस्थिति सरोकार समाज कनकाईमा १६ जना बालबालिका आश्रित रहेको पोखरेलले जानकारी दिइन् । मेची–महाकाली बुहारी संयुक्त  आवाजको सहयोगप्रति आभार व्यक्त गर्दै उनले सबैको सहयोग र सद्भावबाट मात्रै संस्था सञ्चालन गर्न सकिने बताइन् ।