मोरङको विराटनगर महानगरपालिका–४ बाट राजश्व छली अवैध रुपमा विराटनगरबाट इटहरी तर्फ लैजाँदै गरेको ४० लाख बराबरको समान सहित एक जनालाई जिल्ला प्रहरी कार्यालय मोरङले पक्राउ गरेको छ ।

पक्राउ पर्नेमा भारतीय नागरिक जोगवनी टिकुलियाका ३४ वर्षीय श्याम चौधरी रहेका छन् । चौधरीले बीआर ३३ जीवी २६२७ नम्बरको ट्याक्टरमा मोटर पार्टस, छाला, नट बल्टु, मेसिनरी पार्टस पुर्जा र कपडा लगायत गरी अन्दाजी ४० लाख रुपैयाँ बराबरको सामान अवैध रुपमा राजस्व छली गरी इटहरीतर्फ लादै गरेको अवस्थामा विराटनगर–४ बाट प्रहरीले पक्राउ गरेको हो ।

अवैध समान सहित पक्राउ परेका चौधरीलाई बरामद भएको समान र ट्याक्टर सहित आवश्यक कारबाहीको लागि विराटनगर भन्सार कार्यालय बुझाइएको जिल्ला प्रहरी कार्यालय मोरङले जनाएको छ ।