झापा । झापामा दोस्रो चरणको कोरोना भाइरसविरुद्धको खोप अभियान सञ्चालनको तयारीमा स्वास्थ्यकर्मी जुटेका छन् ।  पहिलो चरणमा ९ हजार १६७ जनालाई कोभिसिल्ड खोप लगाएकोमा दोस्रो चरणमा ५८ हजार ५१३ जनालाई खोप लगाउने तयारीमा स्वास्थ्यकर्मी जुटेको जिल्ला स्वास्थ्य कार्यालय झापाले जनाएको छ ।  स्वास्थ्य कार्यालयले बिर्तामोड नगरपालिकाको सभाहलमा सञ्चारकर्मीसँगको अन्तरक्रिया कार्यक्रममा यस्तो जानकारी दिएको हो ।

जिल्लामा फागुन २३ देखि २७ गतेसम्म ८ वटा पालिकामा र चैत १ देखि ५ गतेसम्म बाँकी ७ वटा पालिकामा खोप अभियान सञ्चालन गर्ने स्वास्थ्य कार्यालय झापाका प्रमुख ईश्वरीप्रसाद पौडेलले जानकारी दिए । 

पहिलो समूहमा भद्रपुर, मेचीनगर, अर्जुनधारा, बिर्तामोड, बुद्धशान्ति, बाह्रदशी, हल्दिबारी र कचनकवलका खोप केन्द्रमार्फत ज्येष्ठ नागरिकहरूलाई खोप लगाइनेछ। ती पालिकाहरूमा ३४ हजार ४५६ जना नागरिक ६५ वर्षभन्दा माथि उमेर समूहका रहेको जनाइएको छ ।

त्यस्तै दोस्रो समूहका नागरिकहरूलाई चैत १ देखि ५ गतेसम्म खोप दिइनेछ । सो समूहमा झापा, कनकाई, गौरीगञ्ज, गौरादह, दमक, कमल र शिवसताक्षी पालिकाका खोप केन्द्रहरूबाट सेवा उपलब्ध हुने जनाइएको छ । ती पालिकाहरूमा ज्येष्ठ नागरिकहरूको सङ्ख्या २४ हजार ५७ जना रहेको कोरोना फोकल पर्सन जीवन चौंलागाईंले जानकारी दिए । पहिलो चरण अन्तरगत जिल्लामा गत माघ १४ देखि २४ गतेसम्म र फागुन ५ देखि ११ गतेसम्म ९ हजार १६७ जनालाई कोभिसिल्ड खोप लगाइएको थियो ।

पहिलो चरणमा चिकित्सक, सुरक्षाकर्मी, पत्रकार, जनप्रतिनिधिलाई लगाइएको थियो । खोप लगाएका उनीहरूमा स्वास्थ्य अवस्था सामान्य नदेखिएको कार्यालय प्रमुख पौडेलको भनाई छ । दोस्रो चरणको खोप अभियानका लागि ४३ हजार डोज खोप स्वास्थ्य कार्यालयमा मौज्दात रहेको र अभियानकै क्रममा आवश्यकता अनुसारकै खोप प्राप्त हुने उनले बताए । 

कोरोनाविरुद्धको दोस्रो चरणको खोप अभियान सरकारले फागुन २३ गतेदेखि देशभर सञ्चालन गर्ने निर्णय गरिसकेको छ । सरकारले बुधवार साँझ गरेको निर्णयअनुसार अब ६५ वर्षभन्दा माथिका ज्येष्ठ नागरिकहरूलाई कोरोना विरुद्धको खोप लगाउने जनाएको छ ।