झापा । आगामी चैत ५ गते हुने स्वतन्त्र विद्यार्थी युनियन (स्ववियु) निर्वाचनका लागि झापाको सबैभन्दा ठूलो मेची बहुमुखी क्याम्पसमा ११ वटा संगठनले दर्ता गराएका छन् ।

एरिका थापा प्रमुख रहेको अखिल क्रान्तिकारी , स्वस्तिका लामाको अखिल नेपाल राष्ट्रिय स्वतन्त्र यूनियन , अम्बिर अधिकारीको राष्ट्रिय प्रजातान्त्रिक विद्यार्थी संगठन , गौरव लुइँटेलको अखिल नेपाल राष्ट्रिय स्वतन्त्र विद्यार्थी यूनियन ,हेमराज गौतमको स्वतन्त्र विद्यार्थी कल्याण परिषद् , चन्दनकुमार महतोको नेपाल विद्यार्थी संघ (स्वतन्त्र), कुशल महतको नेपाल विद्यार्थी संघ , दीक्षा कडरियाको अखिल नेपाल विद्यार्थी यूनियन ( समाजवादी) , किशोर ढुङ्गानाको नेपाल विद्यार्थी संघ , रोजन चापागाईँको स्वतन्त्र विद्यार्थी जनहित संघ र निशान दर्नालको मेची विद्यार्थी युनियनले दर्ता गराएको मेची बहुमुखी क्याम्पस स्ववियू निर्वाचन समितिका निर्वाचन अधिकृत डमरप्रसाद रेग्मीले जानकारी दिए ।

स्ववियु चुनावअन्तर्गत आज संघ/संगठन दर्ताको कार्य तालिका रहेको थियो । दिउँसो तीन बजेसम्म संघ÷संगठन दर्ताको समय तोकिएको थियो । निर्वाचन कार्यक्रमअनुसार २१ फागुनमा मतदाता सूची प्रकाशित, २५ फागुनमा मतदाता सूची उपर दाबी विरोध र छानबिनको कार्य तालिका छ । झापाका १३ वटा क्याम्पसहरूमा स्ववियू निर्वाचन हुन लागेको हो ।

निर्वाचन आयोगको कार्यालय स्थापना गरेर निर्वाचन कार्यक्रम सुरु गरिएको मेची बहुमुखी क्याम्पसका क्याम्पस प्रमुख देवी आचार्यले जानकारी दिए । झापामा सबैभन्दा बढी मेची क्याम्पसमा ३४५० जना विद्यार्थी रहेका छन् । जिल्लाका मेची बहुमुखी र गौरादह कृषि क्याम्पस गरी दुई आंगिकसहित १३ वटा क्याम्पसमा स्ववियू निर्वाचन हुन लागेको हो ।

मेची बहुमुखी क्याम्पस भद्रपुर, त्रिदेव क्याम्पस चारआली मेचीनगर, इन्द्रचन्द्र क्याम्पस बिर्तामोड, कनकाई आदर्श क्याम्पस बिर्तामोड,कनकाई बहुमुखी क्याम्पस सुरुङ्गा, दमक क्याम्पस दमक, गौरीगञ्ज बहुमुखी क्याम्पस गौरीगञ्ज , सीतारमेश क्याम्पस बुधबारे ,शनिश्चरे बहुमुखी क्याम्पस अर्जुनधारा, गौरादह कृषि क्याम्पस गौरादह, गरामुनी क्याम्पस बिर्तामोड , गौरादह बहुमुखी क्याम्पस गौरादह र काँकडभिट्टा बहुमुखी क्याम्पस मेचीनगरमा निर्वाचन हुन लागेको जनाइएको छ ।

जिल्लाका क्याम्पसहरूमा हुन लागेको स्ववियू निर्वाचनको सुरक्षाका लागि प्रदेशबाट सर्कुलर आएको जिल्ला प्रहरी कार्यालयका सूचना अधिकारी डीएसपी खगेन्द्र खड्काले जानकारी दिए । विद्यार्थी संगठनहरुले आआफ्ना उम्मेदवार घोषणा गर्न थालेका छन् । यस क्रममा एमाले निकट अनेरास्ववियुले १४ वटा क्याम्पसको स्ववियु सभापतिका उम्मेदवार टुङ्गो लगाएको छ ।

दुई वर्षअघि झापाका १३ वटा क्याम्पसमध्ये १० वटामा शान्तिपूर्ण रुपमा स्ववियू निर्वाचन भएको थियो भने काँकडभिट्टा क्याम्पस , सीतारमेश क्याम्पस र गरामनी क्याम्पसमा विवाद भएको थियो ।