पूर्व मुख्यमन्त्री तथा काँग्रेसको कोशी प्रदेश सभापति एवम् प्रदेशसभा संसदीय दलका नेता उद्धव थापामाथि मुक्का हान्ने नेपाल विद्युत् प्राधिकरणका कर्मचारीहरू धरौटीमा छुटेका छन् ।

अभद्र व्यवहार गरेको आरोपमा प्रहरीले मुद्दा दायर गरेका उनीहरू जिल्ला प्रशासन कार्यालयको आदेशमा रिहा भएका हुन् । नेपाल विद्युत् प्राधिकरण सुरुङ्गाका कर्मचारीहरू शिवसताक्षी ११ का ४९ वर्षीय भक्तबहादुर कटुवाल र कनकाई ३ का ४२ वर्षीय पृथ्वी श्रेष्ठसँग प्रमुख जिल्ला अधिकारी गोपाल अधिकारीले बयान लिएपछि सामान्य धरौटीमा छुटेका हुन् । उनीहरूलाई जनही ५–५ हजार रुपैयाँ धरौटी लिएर छोडिएको प्रमुख जिल्ला अधिकारी गोपाल अधिकारीले जानकारी दिए ।

अभद्र व्यवहार गरेको कसुरमा माघ ६ गते इलाका प्रहरी कार्यालय बिर्तामोडले ३ दिनको म्याद लिएर उनीहरूमाथि मुद्दा दायर गरेको थियो । पूर्वमुख्यमन्त्री तथा काँग्रेस नेता थापामाथि माघ ५ गते साँझ कुटपिट भएको थियो ।

नेपाल प्रेस युनियन झापाले दोमुखामा आयोजना गरेको वार्षिक साधारण सभाबाट फर्किँदै गर्दा साँझ करिब ७ बजे कनकाई नगरपालिकाको जुकेखाडी कल्भर्टनजिक थापामाथि उनीहरूले मुक्का हानेका थिए । बा १ झ ६५३ नं को गाडीमा घर फर्किँदै गरेका अर्जुनधारा ७ निवासी थापामाथि बा १ ञ १८७० मा सवार विद्युत् प्राधिकरण सुरुङ्गाका ती कर्मचारीहरूले कुटपिट गरेका थिए । कुटपिटबाट थापा घाइते भएका थिए । उनको देब्रे आँखा सुन्निएको थियो ।उनलाई उपचारका लागि बिर्ता सिटी अस्पतालमा भर्ना गरिएको थियो । विद्युत् प्राधिकरण सुरुङ्गाका कर्मचारी सवार गाडीले पूर्वमुख्यमन्त्री थापा चढेको गाडीलाई सुरुङ्गा पुलनजिक डाइभर्सनमा साइड नदिएको भन्दै विवाद भएको थियो ।