छठ पूजाका लागि बिरिङ खोलाको घाटतर्फ जाँदै गर्दा मोटरसाइकलले ठक्कर दिँदा तीन जना घाइते भएका छन् । बिहीबार साँझ ४.१० बजे बाह्रदशी गाउँपालिका-२ लिम्बू गाउँनजिक बिरिङ पुलपूर्व हुलाकी राजमार्गमा पश्चिमतर्फ पैदल जाँदै गरेकी कचनकवल गाउँपालिका -६ बनियानी बस्ने ३० वर्षीया पूजा राजवंशीलाई सोही दिशाबाट आउँदै गरेको प्र.१–०१–०१३ प ८३५६ नं.को मोटरसाइकलले ठक्कर दिएको थियो ।

दुवै खुट्टा र कम्मरमा चोट लागेर राजवंशी सख्त घाइते भएकी छन् । दुर्घटनामा मोटरसाइकल चालक बाह्रदशी –२ बुट्टावारि निवासी २४ वर्षीय अबिर आलम र सोही मोटरसाइकलमा अगाडि सवार आलमका छोरा ३ वर्षीय रियाज आलमसमेत सख्त घाइते भएका छन् । घाइते तीन जनालाई उपचारका लागि बिर्तामोडस्थित बिर्ता सिटी अस्पताल लगिएको प्रहरीले जनाएको छ ।