पाँचथरको फिदिम–२ साम्दिनमा भएको आगलागीबाट ८५ लाख बराबरको क्षति भएको छ । आज दिउँसो अन्दाजी ४ बजे फिदिम– २ साम्दिन बस्ने ६२ वर्षीय जयप्रकाश राईको घरमा भएको आगलागीबाट त्यति धेरै क्षति भएको हो । आगलागीबाट राईको घर पूर्णरुपमा जलेर नष्ट भएको छ भने घरभित्र रहेको पसलको किराना सामानहरू, होटेल, नगद, सुनचाँदी, खाद्यान्न, लत्ताकपडा, भाँडा वर्तन, फर्निचरका सामानसमेत जलेर नष्ट भएको प्रहरीले जनाएको छ । घरको अन्दाजी मूल्य ४० लाख र घरभित्र रहेका सामान अन्दाजी मूल्य ४५ लाख गरी जम्मा ८५ लाख बराबरको क्षति भएको प्रारम्भिक अनुमान गरिएको छ ।

सो आगलागीबाट छिमेकी विजय नेम्बाङको घरको बार्दली र धुरीमा सामान्य क्षति पुगेको छ । दुई वटा दमकलसहित नेपाल प्रहरी, नेपाली सेना, सशस्त्र प्रहरी र स्थानीयवासीको सहयोगमा साँझ ६ बजे आगलागी पूर्ण रूपमा नियन्त्रणमा आएको थियो ।

आगलागीबाट घरधनी राई घाइते भएका छन् । शरीरको विभिन्न भागमा आगोले जलेर घाइते राईलाई गणेशमानसिंह सामुदायिक अस्पताल पाँचथरमा प्राथमिक उपचारपश्चात् थप उपचारको लागि झापातर्फ ल्याइएको प्रहरीले जनाएको छ ।