महोत्तरीको बर्दिबासमा मोटरसाइकलको चक्कामा सल बेरिँदा एक युवतीको मृत्यु भएको छ। दुर्घटनामा उनकी आमा गम्भीर घाइते भएकी छन्। पूर्वपश्चिम राजमार्गमा पर्ने बर्दिबास नगरपालिका- ५ टुटेश्वर जङ्गलमा सर्लाहीबाट महोत्तरीको बर्दिबास तर्फ जाँदै गरेको प्रदेश २-०३-००७ प ३३६९ नम्बरको मोटरसाइकल दुर्घटनामा परेको थियो । 

दुर्घटनामा सर्लाहीको बागमती नगरपालिका- ४ कर्मैया निवासी २२ वर्षीया स्मृति कार्की रानाभाटाको मृत्यु भएको इलाका प्रहरी कार्यालय बर्दिबासले जनाएको छ । दुर्घटनामा उनकी आमा ५० वर्षीया उषा कार्की गम्भीर घाइते भएकी छन्। उनलाई थप उपचारको लागि काठमाडौँ लगिएको छ ।

‘मोटरसाइकल स्मृतिले चलाएको थियो । पछाडि बसेकी आमाको सल मोटरसाइकलको पछाडिपट्टिको चक्कामा बेरिँदा मोटरसाइकल अनियन्त्रित भई घटना भएको प्रहरीले जनाएको छ ।