२०८० फाल्गुन १२ गते , शनिबार

एमालेले औपचारिक कार्यक्रम नगर्ने, तीन दिनसम्म पार्टीको झण्डा आधा झुकाउने

sajilo news
काठमाडौं
२०८० भाद्र २६ गते , मंगलबार
एमालेले औपचारिक कार्यक्रम नगर्ने, तीन दिनसम्म पार्टीको झण्डा आधा झुकाउने

नेकपा एमालेले पार्टीका उपाध्यक्ष सुवास नेम्वाङको निधनको शोकमा तीन दिनसम्म पार्टीको झण्डा आधा झुकाउने निर्णय गरेको छ । मंगलबार च्यासलमा बसेको आकस्मिक सचिवालय बैठकले एमाले केन्द्रीय कार्यालय, प्रदेश कार्यालय र उनको निर्वाचन क्षेत्र इलाममा शोकपुस्तिका राख्ने निर्णय समेत गरेको छ। सचिवालयको आकस्मिक बैठकले विशेष शोक प्रस्ताव पारित गरेको छ । असोज २ गते विशेष श्रद्धाञ्जली सभाको आयोजना गर्ने निर्णय गरेको छ।

बैठकका क्रममा एमालेले नेम्वाङको कुर्सीमा फूलमाला राखेको थियो ।  नेम्वाङको हृदयघातबाट मंगलबार राति निधन भएको हो । हृदयघात भएपछि उपचारका लागि राति १:३० बजे त्रिवि शिक्षण अस्पताल लगिएकोमा उपचारको क्रममा त्यहीँ निधन भएको हो।

उनको पार्थिव शरीर अन्तिम श्रद्धाञ्जलीका लागि एमाले पार्टी कार्यालय च्यासलमा  राखिएको छ। श्रद्धाञ्जली दिन त्यहाँ एमाले नेता,कार्यकर्ता तथा शुभचिन्तकहरूको भीड लागेको  छ। एमाले अध्यक्ष केपी शर्मा ओलीले पार्टीको झण्डा ओढाएर नेम्वाङप्रति श्रद्धाञ्जली दिएका छन्। 

नेम्वाङलाई नेकपा समाजवादी पार्टीका सम्मानित नेता झलनाथ खनाल, उपसभामुख इन्दिरा राना मगरलगायतले श्रद्धाञ्जली दिएका छन्। नेम्वाङको पार्थिव शरीर आज दिनभर एमाले पार्टी कार्यालयमा राखिनेछ। सरकारले नेम्वाङको राजकीय सम्मानका साथ अन्त्येष्टि गर्ने निर्णय गरेको छ।

सम्बन्धित समाचार