बलिउडको अत्यधिक कमाइ गर्ने अभिनेत्रीमा उर्वशी रौतेला पर्छिन् । बलिउड अभिनेत्री उर्वशीले चलचित्रको एउटा आइटम गीतमा नाचेको मात्र करोडौँ रुपैयाँ लिने गरेकी छिन् । रिपोर्टका अनुसार उर्वशीले चलचित्र ‘वाल्टेयर वीरया’ को एउटा गीतका लागि दुई करोड रुपैयाँ पारिश्रमिक लिएकी थिइन्। चलचित्र ब्लकबस्टर साबित भएको थियो । यही कारणले अब उर्वशीले आफ्नो पारिश्रमिक पनि बढाइन् । 

छिट्टै उर्वशी राम पोथिनेनीको चलचित्र ‘द वारियर’मा देखिँदै छिन् । यस चलचित्रमा पनि उनी आइटम गीतमा नाच्दै छिन् । खबरअनुसार उनले चलचित्रको तीन मिनेटको गीतका लागि तीन करोड रुपैयाँ माग गरेकी छिन् । यसरी हिसाब गर्दा उनले एक मिनेटको एक करोड मागिन् । त्यस्तै, उनको यसबाहेक चलचित्र ‘पुष्पा २’ का निर्मातासँग पनि आइटम गीतका लागि कुराकानी भइरहेको खबर सार्वजनिक भएका छन् । मोडलिङबाट मनोरञ्जन दुनियाँमा प्रवेश गरेकी उर्वशीले सन् २०१३ मा ‘सिंह साप द ग्रेट’बाट बलिउडमा डेब्यु गरेकी थिइन् ।

उर्वशी आफ्नो हट अवतारका कारण सदैव चर्चामा आउने गरेकी छिन्  । फेसन सेन्स र ग्ल्यामर लुक्सका कारण चर्चा कमाउँदै आएकी उनी सामाजिक सञ्जालमा पनि उत्तिकै सक्रिय छिन् । उनी आफ्ना फ्यानका लागि हट अवतारका तस्बिरहरू सेयर गर्ने गर्छिन् । त्यसलाई उनका फ्यानले पनि निकै रुचाउने गरेका छन् । कुनै समय उर्वशी भारतीय क्रिकेटर हार्दिक पाण्ड्यासँगको प्रेमका कारण चर्चामा थिइन् ।