बिर्तामोड । बिर्तामोड नगरपालिकाका सामुदायिक स्वास्थ्य स्वयंसेविकाहरूले १७ बुँदे माग राखेका छन् । उनीहरूले  नवनिर्वाचित  नगर प्रमुख , उपप्रमुख , १० वटै वडाका वडाध्यक्षसहित नगरका सम्पूर्ण जनप्रतिनिधिहरूलाई भेला गराएर आफ्ना माग राखेका हुन् ।  महँगी बढेका कारण  सामुदायिक महिला स्वयंसेविकाहरूले पाउँदै आएको भत्ता वृद्धि गरी  प्रतिदिन १ हजार र खाजाको २ सय गरी १२ सय पुर्‍याउनु पर्ने ,  मासिक भत्ता नेपाल सरकारले  तोकेको मजदुरको नियम अनुसार उपलब्ध गराउनु पर्ने , सेवाबाट  निवृत्त हुँदा  काम गरेको समयदेखि छोड्ने समयसम्म  महिनाको हजारले गुणा गरी  बिदाइ रकम उपलब्ध गराउनु पर्ने लगायतका माग रहेका छन् । 

 बिर्तामोड ३ स्थित नगर अस्पतालमा आयोजित जनप्रतिनिधिहरूको सम्मान कार्यक्रमका अवसरमा  सो माग पत्र बुझाएका हुन् ।  माग पत्र बुझाउँदै सामुदायिक  स्वास्थ्य स्वयंसेविका नगर समिति बिर्तामोडकी अध्यक्ष निर्मला नेपालले  आफूहरू  प्रतिदिन ८३ रुपैयाँ ज्यालामा काम गर्न बाध्य भएको गुनासो गरिन् । कार्यक्रममा बोल्दै प्रमुख अतिथि नगर प्रमुख पवित्रा महतारा प्रसाईँले आफूहरूले पाएको  जिम्मेवारी अझ ओजपूर्ण होस् भन्दै  हाम्रो नगर राम्रो नगर बनाउने अभियानमा जुट्न सबैलाई आग्रह गरिन् ।

त्यस्तै उपप्रमुख नगेन्द्रप्रसाद सङ्ग्रौलाले आफ्नो जिम्मेवारीप्रति जबाफदेही नहुने  नगरपालिकाका कर्मचारीलाई  कामबाट बिदा दिइने बताए । बिर्तामोड नगरपालिकामा  २२६ जना कर्मचारी र ३० जना स्वास्थ्य स्वयंसेविका कार्यरत रहेका छन् । सामुदायिक  स्वास्थ्य स्वयंसेविका नगर समिति बिर्तामोडकी अध्यक्ष नेपालको अध्यक्षतामा भएको  कार्यक्रममा बिर्तामोड ३ का वडाध्यक्ष मदन बुढाथोकीले पनि बोलेका थिए ।  पवित्रा राजवंशीले स्वागत मन्तव्य राखेको कार्यक्रमको सञ्चालन  बबिता घिमिरेले गरेकी थिइन् ।