२०७८ माघ ५ गते , बुधवार

हुलाकी राजमार्ग : झापामा सडक बन्यो, पुल नबन्दा राजमार्ग सञ्चालनमा अवरोध

हुलाकी राजमार्ग : झापामा सडक बन्यो, पुल नबन्दा राजमार्ग सञ्चालनमा अवरोध :: Times of Pradesh

झापा । पूर्व पश्चिम राजमार्गको विकल्पको रुपमा निर्माण सुरु भएको हुलाकी राजमार्गको झापा खण्ड निर्माणको अन्तिम चरणमा पुगे पनि पुल नबन्दा तत्काल सञ्चालनमा अवरोध देखिएको छ । 

राष्ट्रिय गौरवको योजनाको रुपमा रहेको राजमार्गको झापा खण्ड ४८ किलोमिटर छ भने यहाँ आठ ठूला नदीमा पुल निर्माणाधीन छन् । तीमध्ये कनकाई, रतुवा, विरिङ र कमल खोलाका पुल सम्पन्न हुन समय लाग्ने र सानोमाई, लेहरा, कृष्णे र भुतेनी खोलाका पुल निर्माण अन्तिम चरणमा पुगेको हुलाकी राजमार्ग योजना कार्यालय इटहरीका इन्जिनियर प्रमोद खतिवडाले जानकारी दिए।

उनका अनुसार विसं २०६८ मै हुलाकी सडक पर्ने कनकाई, रतुवा खोलाका पुल निर्माण सुरु गरिएको थियो तर, एक दशक बितिसक्दासमेत कार्य सम्पन्न नहुँदा राजमार्ग सञ्चालनमा अवरोध भएको हो । उनले मुलुकको राजनीतिक अस्थिरता र कोेरोना महामारीलगायतका कारणले पुल निर्माणमा ढिलाई भएको बताए । “जति ढिलो हुनु भइसक्यो”, उनले भने, “आर्थिक वर्ष विसं २०७९÷०८० को अन्त्यसम्ममा सडकभित्र रहेका सबै पुल निर्माण भइसक्ने गरी काम भइरहेको छ ।”  जिल्लामा साना ठूला खोलामा गरी करिब २५ मी लम्बाइदेखि ६२४ मी लामो पुल निर्माण भइरहेको छ । 

सडक निर्माण अन्तिम चरणमा

भद्रपुरको मेची पुलदेखि मोरङको सिमानामा रहेको रतुवा खोलासम्म करिब ४८ मध्ये ३५ किलोमिटर कालोपत्रेसहितको सडक निर्माण सकिएको छ । इन्जिनियर खतिवडाले राजगढको जनता बजारदेखि कनकाई पुल छेउको कुञ्जिबारीसम्मको १३ किलोमिटर मात्र कालोपत्रे हुन बाँकी रहेको बताए । उनले चालु आर्थिक वर्षको अत्यसम्ममा झापा खण्डमा रहेको ४८ किलोमिटर नै सडक सम्पन्न हुने बताए ।

सो सडक दुई लेनको बनिरहेको छ । उहाँले बस्ती नभएको स्थानमा सात मिटर चौडाइ भएको र बाक्लो बस्ती भएको बजार क्षेत्रमा दुवै सडकको किनारमा नालीसहित १२ मिटरको सडक निर्माण भएको बताए । मेचीपुलदेखि राजगढको जनताबजारसम्मको २० किमी सडकको ठेक्का आशिष याक्थुमहाङ जेभी र जनताबजारदेखि रतुवा खोलासम्मको करिब २८ किलोमिटर पिएस गजुरमुखी मोतिदान जेभीले लिएका छन् । 

पूर्वमेचीदेखि पश्चिम महाकालीको चाँदनी दोधारा पुलसम्म एक हजार ६००मी को हुलाकी मार्ग निमौणपछि तराई मधेशका सर्वसाधारणको जीवनस्तर उकास्न मद्दत पुग्ने देखिन्छ । सो सडक निर्माणलाई विभिन्न खण्डमा विभाजन गरेर काम भइरहेको उनको भनाइ छ । 

त्यसैगरी, हुलाकी सडकअन्तर्गतकै चारआली केचनासम्मको सडकको निर्माण कार्य अन्तिम चरणमा पुगेको छ । ४० किलोमिटर सडकमध्ये ३९ किलोमिटर सडकको निर्माण सकिएको उनले जानकारी दिए ।

हुलाकी सडकले फेरियो गौरीगञ्जको मुहार

जिल्लाको पुरानो बजार गौरीगञ्जको मुहार हुलाकी सडक निर्माणसँगै फेरिएको छ । बजारको करिब डेढ किलोमिटर क्षेत्रमा भने ‘फोर लेन’को सडक निर्माण भएको छ । यो सडक बनेपछि गौरीगञ्जमा बसाई सरेर आउनेको सङ्ख्यामा वृद्धि भएको छ ।

गौरीगञ्ज गाउँपालिकाका अध्यक्ष बाबुराजा श्रेष्ठले हुलाकी सडकका कारण यस क्षेत्रको व्यापार व्यवसायसमेत फस्टाएको बताए ।  उनले भने, “दुई वर्षअघिसम्म यहाँबाट अन्यत्र बसाई सरेर जाने मात्र हुन्थे, अहिले बाहिरका मानिसहरु आएर भटाभट घडेरी किनेर घर बनाइरहेका छन् ।”

उनले पाँच वर्ष अघिसम्म प्रतिकट्ठा रु पाँच लाखमा पाइने जग्गाको मूल्य बढेर हाल रु २५ लाख पुगेको जानकारी दिए । गौरीगञ्ज बजारको करिब पाँच किलोमिटरको दूरीमा रहेको रतुवा खोलाको पुल बनेर सडक सञ्चालनमा आएपछि गौरीगञ्जसहित दक्षिणी क्षेत्रको स्वरुप नै फेरिने विश्वास लिएको बताए । रासस



टाइम्स अफ प्रदेश अनलाइन न्युज पाेर्टलमा प्रकाशित कुनै समाचारमा तपाईंको गुनासो भए हामीलाई info@timesofprdesh.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर र युट्युबमा पनि जोडिन सक्नुहुन्छ




Leave a comment