२०७८ आश्विन ७ गते , विहीवार

काँकडभिट्टाको मुख्य नाकाबाटै नयाँ शैलीमा पेट्रोलियम पदार्थको तस्करी, भारतीय ट्रकमा बरामद भयो ५५० लिटर डिजेल

पश्चिम बङ्गाल भन्दा झापामा डिजेल ३५ रुपैयाँ सस्तो

काँकडभिट्टाको मुख्य नाकाबाटै नयाँ शैलीमा पेट्रोलियम पदार्थको तस्करी, भारतीय ट्रकमा बरामद भयो ५५० लिटर डिजेल :: Times of Pradesh

(पार्थ मण्डल) झापा । कोरोना महामारीको बेला झापाका सीमा नाकाबाट पेट्रोलियम पदार्थको तस्करी नयाँ शैलीबाट हुने गरेको पाइएको छ ।  भारतबाट नेपाल आउने मालवाहक सवारीसाधनले छुट्टै टयांकी जडान गरी नेपालबाट पेट्रोलियम पदार्थ भारत लैजाने गरेको घटना सार्वजनिक भएपछि पेट्रोलियम पदार्थको तस्करी गर्ने नयाँ शैली पत्ता लागेको हो ।  काँकडभिट्टा नाकाबाट सोमबार बिहान ९ बजे नेपाली वस्तु ढुवानीका लागि भारतीय नम्बर प्लेटको डब्लुबी ७४ डी २४४१ नम्बरको खाली मिनी ट्रक नेपाल प्रवेश गरेका थिए ।  त्यसपछि सो मिनी ट्रक सोजै धुलाबारीतर्फ लागे । सो ट्रकले छुट्टै डिजेलको टयांकी जडान गरेको कसैले सुइँको समेत पाएन । 

धुलाबारीबाट सामान लोड नगरी त्यतिकै फर्किएका सो ट्रकका चालक पश्चिम बङ्गाल दार्जिलिङ जिल्ला नक्सालवारिको रथ खोला निवासी ३० वर्षीय विकास दास र सह–चालक सोही ठाउँका ३४ वर्षीय सुजल साहाले मेचीनगर– ६ स्थित पूर्वाञ्चल पेट्रोल पम्पबाट ट्रकमा ५५० लिटर डिजेल हाले ।  ट्रकमा रहेको डिजेल टयांकी नहालेर उनीहरूले सो डिजेल छुट्टै जडान गरिएको टयांकीमा हालेका थिए । डिजेल हालेर पुनः काँकडभिट्टा नाकाबाट भारत जान लागेका ट्रकलाई विशेष सूचनाको आधारमा इलाका प्रहरी कार्यालय काँकडभिट्टाको टोली सोमबार दिउँसो २ बजे मेची पुल नजिकै नियन्त्रणमा लिएको जिल्ला प्रहरी कार्यालय झापाका डिएसपी राकेश थापाले जानकारी दिए । 

‘नियन्त्रणमा लिएर ट्रकलाई चेकजाँच गर्दा ट्रकमा एउटा छुट्टै टयांकी जडान गरेको र सो टयांकीमा ५५० लिटर डिजेल बरामद गरियो,’ डिएसपी थापाले भने । यता ट्रकसहित चालक र सहचालकलाई ७ लाख मूल्याङ्कन तोकेर सोमबार नै मेची भन्सार कार्यालय बुझाइसकेको इलाका प्रहरी कार्यालय काँकडभिट्टाका डिएसपी सुनिल दाहालले जानकारी दिए । ‘काँकडभिट्टा सीमा नाका पेट्रोलियम पदार्थको यस्तो धन्दा भइरहेको थाहा थिएन, गाडी नियन्त्रणमा लिएपछि घटना बाहिरियो, अब भारतबाट आउने सबै सवारीसाधनमाथि प्रहरीले उच्च निगरानी बढाउछ,’ डिएसपी दाहालले भने । 

पश्चिम बङ्गालमा डिजेलको मूल्य भारतीय ९१ रुपैयाँ ७१ पैसा अर्थात् नेपाली १४६ रुपैयाँ ७३ पैसा पर्छ । झापामा डिजेलको मूल्य १११ रुपैयाँ ५० पैसा पर्छ । पश्चिम बङ्गाल भन्दा झापामा डिजेलको मूल्य ३५ रुपैयाँ ३१ पैसा सस्तो छ । ट्रक चालकले ५५० लिटर डिजेल भारत लगे बापत १९ हजार ३७९ रुपैयाँ कमाउँथे ।  यसरी दैनिक भारतबाट नेपाल प्रवेश गर्ने भारतीय मालवाहक गाडीले नेपालबाट पेट्रोलियम पदार्थ बोकेर कति औ पटक लगिसकेको होला त्यसो लेखाजोखा नै छैन ।




टाइम्स अफ प्रदेश अनलाइन न्युज पाेर्टलमा प्रकाशित कुनै समाचारमा तपाईंको गुनासो भए हामीलाई info@timesofprdesh.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर र युट्युबमा पनि जोडिन सक्नुहुन्छ




Leave a comment