२०७८ बैशाख ७ गते , मंगलवार

काँकडभिट्टा नाकाबाट भित्रिने तरकारीको गाडीमा कपडा ! एसएसबीले बरामद गर्‍यो ठुलो परिमाणको सामान

काँकडभिट्टा नाकाबाट भित्रिने तरकारीको गाडीमा कपडा ! एसएसबीले बरामद गर्‍यो ठुलो परिमाणको सामान :: Times of Pradesh

(पार्थ मण्डल) झापा । पूर्वी नाका काँकडभिट्टाबाट नेपाल भित्रिने तरकारी तथा फलफूल लोड गरिएका गाडीहरूमा लत्ताकपडासहित अन्य सरसामान अवैध रुपमा नेपाल भित्रिने गरेको घटना बाहिरिएको छ ।  भारतबाट त्यसरी भित्रिने गरेका गाडीहरूले मेची भन्सार कार्यालय काँकडभिट्टामा तरकारी तथा फलफूलको मात्र राजश्व तिर्ने र गाडीभित्र रहेका लत्ताकपडा र अन्य सामान बिना भन्सार पास हुने गरेको पाइएको छ । 
काँकडभिट्टासँग जोडिएको भारतको पानीटंकी नाकामा भारतीय एसएसबीले विशेष सूचनाको आधारमा आलु र सब्जीका बोराहरू लोड गरिएका एउटा गाडी चेकजाँच गर्दा त्यसभित्र ठुलो परिणामको लत्ताकपडा फेला पारेपछि यस्तो घटना बाहिरिएको हो ।  सीमा नाकामा तैनाथ एसएसबीका ४१ बटालियन गौरसिंहबस्तीबाट खटिएका टोलीले भारतीय नम्बर प्लेटको मिनी ट्रकमा लोड गरिएका आलु र सब्जीका बोरा निकालेर हेर्दा त्यसभित्रबाट लत्ताकपडा बरामद गरेको हो । ट्रकको तल लत्ताकपडाका पोकाहरू राखेर माथिबाट आलु र सब्जीका बोरा राखिएको थियो । 
एसएसबीले मेची नदीमा बनेको नयाँ पुलबाटै सामानसहित ट्रक चालकलाई नियन्त्रणमा लिएको छ । नियन्त्रणमा लिएका लत्ताकपडाको आवश्यक कागजात चालकले देखाउन नसकेपछि करिब भारतीय रुपैयाँ १० लाख मुल्याकंन तोकेर सामान, ट्रक र चालकलाई आवश्यक कारबाहीका लागि पानीटंकी भन्सार कार्यालय बुझाइसकेको एसएसबीले जानकारी दिएका छन् । 
पानीटंकी भन्सारलाई समेत तरकारीको राजश्व तिरेर लुकाई छिपाई ट्रक तथा पिकअपमा यसरी नै सरसामान नेपाल भित्राउँदै आएको यही घटनाले पुष्टि गरेको छ । भारतमा लोड भएर आउने त्यस्ता ट्रक तथा पिकअप भ्यानलाई मेची भन्सार परिसरभित्र पनि चेकजाँच गरिँदैन । विषादी परीक्षण पश्चात् तरकारी र सब्जीको राजश्व तिरेर भन्सारबाट निस्किने ती गाडीहरू सोजै गन्तव्य तर्फ जाने गरेका छन् । भन्सारमा राजश्व तिरेर निस्किएका तरकारीका गाडीलाई बाटोमा पनि सशस्त्र र नेपाल प्रहरीले कुनै चेकजाँच गरेको पाइँदैन । यता मेची भन्सार प्रमुख धुव्रराज विश्वकर्माले भारतबाट आउने तरकारी गाडीहरू सामान्य रुपमा चेकजाँच गरिने बताए । 
तरकारीका गाडी लत्ताकपडा लगायत अन्य सरसामान आउने विषयमा आफ्नो जानकारीमा नआएको बताउँदै प्रमुख विश्वकर्माले भने, ‘भारतीय एसएसबीले तरकारी भएको ट्रकमा लत्ताकपडा फेला पार्यो भने ती सामान भन्सार भएर पनि जान सक्ने सम्भावना बढेको छ, अबदेखि तरकारीका गाडीहरूलाई भन्सारभित्रै चेकजाँच गरेर मात्र पठाइने छ, यसमा म आफै लाग्ने छु ।, ‘अहिलेसम्म मेची भन्सारमा लत्ताकपडा नआएकै छैन, नेपाली बजारमा भारतीय लत्ताकपडा छ्यापछ्याप्ती पाइन्छ, यस विषयमा जिल्ला स्तरीय राजश्व चुहावट तथा नियन्त्रण समितिमा पनि कुरा उठिरहेको छ,’ उनले भने ।’  यता इलाका प्रहरी कार्यालय काँकडभिट्टा डिएसपी सुनिल दाहालले भारतबाट आउने तरकारीका गाडीहरू सोजै भन्सार जाने गरेको बताए । 
भन्सार प्रवेश गर्ने सामानमाथि प्रहरीले हस्तक्षेप गर्न नमिल्ने बताउँदै डिएसपी दाहाले भने, ‘अब भन्सारसँगको सहकार्यमा भारतबाट तरकारी लगायत अन्य सरसामान लिएर आउने गाडीमाथि निगरानी बढाउने छौं, तरकारीका गाडीमा अन्य सरसामान ल्याउने घटना बाहिरिएकोले यस घटनाले प्रहरीको पनि ध्यानाकर्षण गराएको छ ।’    



टाइम्स अफ प्रदेश अनलाइन न्युज पाेर्टलमा प्रकाशित कुनै समाचारमा तपाईंको गुनासो भए हामीलाई info@timesofprdesh.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर र युट्युबमा पनि जोडिन सक्नुहुन्छ




Leave a comment