२०७८ बैशाख ७ गते , मंगलवार

झापामा किसानले माघमै रोपे धान 

झापामा किसानले माघमै रोपे धान  :: Times of Pradesh

(विष्णुप्रसाद पोखरेल) दमक । अन्नको भण्डार भनेर चिनिएको झापामा माघ फागुनमा नै धान रोप्ने काम शुरु भएको छ । पछिल्लो समयमा जिल्लामा तीन बालीसम्म किसानले धान लगाउन थालेका छन् भने नयाँ प्रविधिको प्रयोग बढ्दो अवस्थामा छ ।

उत्पादन लागत कम गर्ने र तीनपटक सम्म धान वाली लगाउन किसानहरु तत्पर देखिएपछि यसले उत्पादनको क्षेत्रमा सकारत्मक प्रभाव पार्ने बताईएको छ । प्रधानमन्त्री कृषि आधुनिकरण परियोजना अन्तर्गत धान सुपरजोन कार्यक्रम लागु भएसंगै किसानहरु बोरो धान खेतीतर्फ आकर्षित बन्दै गको पाईन्छ ।

चक्लाबन्दी खेती पकेट योजना अन्तर्गत कचनकवल ४ फेर्कागाछीमा रहेको हरित कृषक समुहमार्फत अहिले धान रोपाई भएको हो । राईस प्लान्टर ९धान रोप्ने मेसीन० बाट धान रोप्नका लागि त्यसै अनुसारको धानको बीउ तयार पारेर समुहले धान रोपेको हो । परम्परागत रुपमा बीउ राखेर र प्लान्टरका लागि बेग्लै बीउ राखेर बोरो धान लगाईएको समुहका अध्यक्ष कनयैलाल गणेशले बताए ।

प्रधानमन्त्री कृषि आधुनिकरण परियोजना, परियोजना कार्यान्वयन एकाइमार्फत १ सय २० हेक्टरभन्दा बढी क्षेत्रमा बोरो धान खेती भएको परियोजना कार्यान्वयन एकाइ प्रमुख रवीन्द्र सुबेदीले बताए । मंसिर महिनामा बीउ राख्ने र माघ अन्तिम सातासम्म रोप्ने कार्य भएको उनको भनाइ  छ ।

बोरो धान खेतीको उदेश्य सकेसम्म तीनबाली लगाउन भएको पनि सुबेदीको भनाई छ । सुपरजोन क्षेत्रमा सिँचाईका लागि सोलार प्रणाली जडान भएको क्षेत्रमा बिशेष गरेर बोरो धान रोपाई भएको छ । चैते धान भन्दा अघि बीउ राखेर धान रोपिएको अवस्थामा यसलाई बोरो भनिदै आएको छ । चैते धान रोप्नका लागि बीउ राख्ने समय फागुन दोश्रो सातादेखि शुरु हुन्छ ।

झापा जिल्लामा कार्यान्वयनमा आएको धान सुपरजोन क्षेत्रको पूर्वाधार स्थिति, उत्पादन तथा उत्पादकत्व स्थिति, यान्त्रिकरण, प्रशोधन तथा बजारीकरणको स्थिति साथै आवश्यक प्रविधि तथा उत्पादन सामाग्रीको स्थिति र कृषकले अवलम्बन गरको प्रविधिलाई दिगोपना तथा प्रतिस्पर्धाका स्थितिका आधारमा करिब ५ सय हेक्टरभन्दा बढी धानको क्षेत्रफल ढाक्ने गरि धान सुपरजोन ४ वर्षअघि स्थापना भएको थियो ।

कचनकवल सहित केहि क्षेत्र समेटेर शुरु भएको धान सुपरजोन अहिले जिल्लाभर ४१ सय हेक्टर क्षेत्रफल विस्तार भएको पनि सुबेदीले बताए । सोसँगै जिल्लामा बोरो खेतीको सम्भवाना पनि बढेको उनको भनाई छ । 'पुरानो धान सुपरजोन क्षेत्रभित्र बोरो खेती बढि गरेको देखिन्छ, उनले भने ।'



टाइम्स अफ प्रदेश अनलाइन न्युज पाेर्टलमा प्रकाशित कुनै समाचारमा तपाईंको गुनासो भए हामीलाई info@timesofprdesh.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर र युट्युबमा पनि जोडिन सक्नुहुन्छ




Leave a comment